ARQUÀ PETRARCA

di Giancarlo Fabbian

Arquà che la xe tuta in salida, a volte anca dura, ma che me porta a ch’el borgo antico, del 1300, dove el grande poeta Francesco Petrarca, ga vissù i so ultimi ani, in conpagnia de la so gata, nel ricordo dela so bela Laura. In te sto borgo ga anca vissù i antichi veneti e dopo l’Inperatore Augusto lo ga svilupà nela Decima rejon, intorno al Monte Castelo e al Monte Ventolon. Nel XIII secolo el jera feudo dei Marchesi d’Este e dopo el xe sta dentro ai beni dei Carraresi de Padoa. Nel 1300 Francesco Petrarca el se ga inamorà de sti posti e el ghe xe sta fin ch’el xe morto, la so tonba la xe davanti al piassale della cesa de Santa Maria ‘Sunta. Soto la Repubblica de Venessia, tanti nobili, come i Contarini, i Pisani, i Capodevaca, i Zabarela, i xe sta ciapà dala moda petrarchesca e i se ga fato dele bele case quassù, che le xe ‘ncora godù dai foresti, parchè le xe restà come ‘na volta, come del resto la Casa del Poeta. Un cò Arquà Petrarca el se vanta del titolo de uno dei più beli Borghi d’Italia e Bandiera Arancion del Touring Club. Soto la passa de la cesa ghe xe la Fontana del Petrarca dove se trova, quasi sparìa, la scritta: “ Ghe xe un dio, ospite de ‘sta fontana. Onora ‘sta aqua, bevendola el Petrarca el ga cantà versi divini”.