MOSSELESE
di Giancarlo Fabbian
… dove l’arzare el fa dele curve, come
ch’el fusse davero un bisato, ala fine de
queste a vedo la magnifica Cà Barbaro,
fata sora un montesèo, co’ ‘na bela scalinà
e sircondà da vigne e da cipressi.
Nel’800 a nord de Cà Barbaro xe sta scavà
la scaìà e un cò ghe xe un bel laghetto
dal colore verdeazuro.
Fati mille metri ‘ncora, a vedo Marendole,
na frassion de Mosselese , dove iera
paroni i Marchesi De Bussacarini, che li
gaveva piantà casa prima de ‘ndare definitivamente
a Costabissara.
‘Ndando ‘vanti me vien incontro el Montericco
e la Rocca de Mosselese, la me
stupenda sità, dove che so nato e che ghe
voìo un ben che no ve digo. Mosselese la
ga ‘na storia antica ‘ncora sconta, ma xe
sta trovà dei resti del tenpo del bronzo.
Feudo Longobardo e sità che ghe faséa
gola a tutti, deventà anca castrum, come
Padova e Mantova, che gnanca Alboino
el xe riussìo a conquistare, parchè co’ le
so mura e la so Rocca e dal 1200/300
col so canale navigabile, la jera ‘na vera
fortessa.
La storia la dise che dal 774 la ga passà,
in te maniera o in te l’altra, tanti paroni a
partire dai Franchi, i Estensi, l’Imperatore
Fedrico II col so logotenente Ezzelino da
Romano, i Scaligeri, i Carraresi e i Venessiani,
i quali fin dal 1405 i se ga fato dei bei
Palassi par le vacanse e par vegnere a tore i
schei dele so canpagne.
Mosselese la conserva ‘ncora tante bele
robe dei chei tenpi ‘ndà, come la Torre civica, la cesa de San Paolo un cò deventà Museo
e sala mostre, el palasso dela Loggetta,
el Castelo Cà Marcelo, Cà Nani Mocenigo, el
Domo Vecio o Pieve de Santa Jiustina fata
fare da san Prosdocimo nel 47 d.C., ma ch a
ch’el tenpo la jera in sima ala Rocca, quela
che ghe xe ‘desso la xe del 1256, la Rotonda,
la Porta Romana, le sette chiesette e quela
de san Giorgio co’ i corpi de Martiri e san
Valentin, Villa Duodo, l’Esedra de San Francesco,
el Torrion o Mastio federiciano, Villa
Pisani, Villa Contarini, Cà Bertana, palasso
Capodivacca e a Rivella villa Emo Capodilista
col so stupendo jardin, el monastero
de san Jacomo, la cesa de san Tommaso, la
cesa de santo Stefano.
Un cò ghe xe restauri in opara par recuperare
i resti dei sette serci de mura che
ghe iera nel medievo e anca la torreta in
piasseta Ossicela.
Ghe xe anca i resti dele cave par la produssion
de trachite e de scaia par fare el
cemento e ghe xe anca la torre de ‘na
vecia fornasa de calsina.
Mosselese la xe anca ‘na sità ‘bastansa
inportante parchè ghe xe la ferrovia, le
strade statali e le autostrade.
Da calche ano se fa la Jostra de la Rocca,
co’ ‘na procession de pì de millesinquesento
personaj in costume medievale a
la matina, e dopodisnà se corre coi cavali
par ciapare el Palio co’ la corsa de
la Quintana.
Questa ormai la xe deventà la manifestassion
pì inportante dela nostra
sità.