ESTE
di Giancarlo Fabbian
…la strada xe streta e la rasenta el monte,
però a destra go trovà ‘na bea strada ciclabile,
che la me porta a Este traverso el quartiere
novo del Mejaro, dove se vede dei bei
canpi sportivi, me se pàra davanti el Castelo
del XIV secolo, rifato dopo che Ezzelino lo
ga derfà nel 1238. El Castelo el xe sta fato
dal Marchese d’Este, sircondà da granda
muralia e da dodese toresini, col so Torrion
in mezo par dominare tuta la zona, e che
finisse co’ un casteleto, ciamà Rocca del
Soccorso. Nel 1405, i Mocenigo i se ga fato
fare un Palasseto par starghe co’ la fameia.
Ma la storia del nome Este la pare vegnere da
Ateste, un soldà vegnù da Troia. Da ste parte
passava, prima dela “rotta” del 1589, che la
ga spostà el fiume verso sud. El territorio el
xe deventà ‘na colonia romana, dopo che i
veneti i xe deventà alleati dei romani contro
i Galli. Este la se ga mantegnù ben par tutto
el periodo dela Rpubblica Romana, finchè
Attila non la ga derfà deventando un piccolo
villagio. Ga bisognesto rivàre fin al
Mille, quando i feudatari Azzo I e Azzo II i
xe deventà i Signori d’Este col titolo de Marchesi,
co’ capitale del marchesato a Ferrara.
Nel 1249, Ezzelino da Romano ga distrutto
‘ncora el Castelo, che pì ‘vanti, verso el XV
secolo xe sta rimesso a novo, prima dai Scaligeri
e dopo dai Carraresi e i Visconti. Soto
el dominio dela Serenissima Repubblica
de Venessia (1405 – 1630) Este la ga vissudo
tranquilla, ma anca qua xe rivà la peste, che
la ga messa a tappéo. Verso la fine del 1700
sotto Napoleone Bonaparte, la ga ciapà fià e
in te ch’el periodo xe nato el Museo Atestino
e le scole pubbliche. Este la se ga svilupà
e la xe rivà al’anession del Regno d’Italia
(1866) in boni stati, co’ i so bei monumenti:
El Museo dentro al Palasseto dei Mocenigo,
el Castelo, la Roca del Ponte dela Torre, la
Torre Civica dela Porta vecia, el Palasso del
Municipio, el Palasso dei Scaligeri deventà
nel 1848, Gabinetto de lettura, el Palasso
Principe in sima al Monte, el Domo de
Santa Tecla, la Basilica de santa Maria dele
Grassie, la cesa dei Soccoli, la cesa dela
Beata Vergine dela Salute e quela pì antica,
la pare romanica, de san Martin. Este la xe
un cò ‘na cità piena de inissiative, anca se
la se lagna un poco, parchè la xe un poco
spostà dale strade nassionali.